မွန်ပြည်နယ် က ခေါင်းဆေးကျွန်း ( သို့ ) မဏိဇောတကျွန်း ဘာကြောင့် မြစ်ရေမမြုပ်သလဲ

Posted on

” ခေါင်းဆေးကျွန်း သို့မဟုတ် မဏိဇောတကျွန်း ဘာကြောင့် မြစ်ရေ မမြုပ်သလဲ…

“ခေါင်းဆေးကျွန်း ”

” မြတ်စွာဘုရားရှင် ဟင်္သာမင်းဘဝ မှာ ဟင်္သာကိုးသောင်း ခြံရံပြီး ဟိမဝန္တာတောကနေ အရှေ့ဘက်ကို အစာရှာ ထွက်ကြတယ်မြေးရဲ့။

အဲ့ဒီတုန်းက မော်လမြိုင်တဝိုက် တောတွေတောင်တွေအကုန်လုံး ရေပြင်ကြီးပေါ့။ တစ်နေ့တော့ ဟင်္သားကိုးသောင်း ရေပြင်ပေါ်အဖြတ်မှာ မိုးကြီးလေကြီး ကျလာပါလေရော။ မိုးကြောင့် ငှက်တွေ အတောင်စိုပြီး ရေထဲပြုတ်ကျမယ့် ဘေးကိုမြင်တော့ ဘုရားလောင်းဟင်္သာမင်းက သစ္စာဆိုပြီး တိုင်တည်တယ်။ တောမှာ ကျန်ခဲ့တဲ့အဆွေအမျိုး မိဘဘိုးဘွား အိုမင်မစွမ်း ဟင်္သာအပေါင်းနဲ့ အရွယ်မရောက်သေးတဲ့ ငှက်ငယ်လေးတွေ ရှင်သန်ရပ်တည်ဖို့ အစာရှာပါတယ်။

ဤသစ္စာစကားမှန်ကန်ခဲ့ပါက ဘေးအန္တရာယ်က ကင်းလွတ်ပါစေပေါ့။ ဟင်္သာမင်းရဲ့သစ္စာစကားကြောင့် သိကြားမင်းက မဏိဇောတပတ္တမြားကို ရေပြင်ပေါ်ပစ်ချပေးပြီး ကျွန်းဖြစ်စေခဲ့တယ်လေ။

ရှေးကဒီကျွန်းကို ” မဏိဇောတကျွန်း ” လို့ ခေါ်ကြတယ်။ နဂါးမင်းကလည်း သူ့ကိုယ်ငွေ့တွေလွှတ်ပြီး ဟင်္သာငှက်တွေရဲ့တောင်ပံကို ခြောက်သွေ့အောင်ကူညီခဲ့တာပေါ့။ အခုထိကျွန်းပေါ်မှာ နဂါးပွက်စမ်းတွေ ရှိနေသေးတယ်လို့ဆိုပါတယ်​

“ဘီလူးကျွန်း”

သထုံပြည်မှာ သောင်းကျန်းနေတဲ့ ဘီလူးတွေကို ရှင်အရဟံမထေရ်မြတ်က မနုဿီဟ ခြင်္သေ့လူသားနဲ့ ဆုံးမနှိပ်ကွပ်တော့ ဘီလူးတွေပြေးလာပြီး ဒီကျွန်းမှာ နေကြတယ်လို့ ဘီလူးကျွန်းလို့ေ​ခ်ါဆိုတယ်

“ခေါင်းဆေးကျွန်း ၊ နတ်ရေတွင်း နှင့် ရှေးဘုရင်များ”

ခေါင်းဆေးကျွန်းသည် မော်လမြိုင်မြို့ နှင့် မုတ္တမအကြား သံလွင်မြစ် အထ္ထရံမြစ် ဂျိုင်းမြစ် ဒုံသမိမြစ် ဟောင်သရောမြစ် (စန္ဒရောမြစ်) စသည့် မြစ် ၅ ခုတို့စီးဝင်ပေါင်းစုံရာ သို့မဟုတ် သံလွင် အထ္ထရံ ဂျိုင်း ဒုံသမိ မြစ် ၄ စင်း မှ ပင်လယ်သို့ စီးဝင် ပေါင်းဆုံရာ မြစ် ၅ ပွင့်ဆိုင်တွင် တည်ရှိသော ကျွန်းတစ်ကျွန်းဖြစ်သည်။

ခေါင်းဆေးကျွန်းကို ရှေးအခါက အောင်မြေကျွန်း ပတ္တမြားကျွန်း ရတနာကျွန်း မြစ်ဦးခိုက်ကျွန်း ပဒေသာကျွန်း အဗန္ဓရကျွန်း ငွေယားကျွန်း သိုက်ပေါင်းစုံကျွန်း သင်္ကြန်ကျွန်း ပွန်စလိုင် ခေါင်းဆေးကျွန်း ကျီးကျွန်း (crow island) ဟူ၍ အမည်အမျိုးမျိုးဖြင့်ခေါ်ခဲ့ကြသည်။

ရှေးအခါက မွန်ဘုရင်အဆက်ဆက်သည် ခေါင်းဆေးကျွန်း အနောက်နောင်အရပ် စနေထောင့်ရှိ နတ်ရေတွင်းမှ ရေဖြင့်
နန်းတက်ဘိသိတ်မင်္ဂလာပြုခြင်း ရန်အပေါင်းကို အောင်မြင်ရန် ဦးခေါင်းဆေးမင်္ဂလာပြုခြင်း ဘုန်းတန်ခိုးတက်စေရန် ဦးခေါင်းဆေးမင်္ဂလာ ပြုခြင်း များကိုဆောင်ရွက်ခဲ့ကြသည်။

မွန်ဘုရင်များသာမက မြန်မာဘုရင် ယိုးဒယားဘုရင် ခမာဘုရင်များသည်လည်း ဤခေါင်းဆေးကျွန်းနတ်ရေတွင်းမှရေဖြင့် ဦးခေါင်းဆေးမင်္ဂလာပြုခဲ့ကြသည်။

အနော်ရထာမင်းသည် သထုံပြည်ကို လာရောက်တိုက်ခိုက်စဉ်က မြို့ကို သိမ်းယူနိုင်စွမ်း မရှိခဲ့ပေ။ ရာဇသင်္ကြန်အမတ်၏ အကြံပေးချက်အရ ပွန်စလိုင်ရှိနတ်ရေတွင်းမှ ရေကို ဆောင်ယူစေ၍ ဦးခေါင်းဆေး ပြီးမှသာလျှင် သထုံမြို့ရှိ ကြက်မတစ်ဝပ်စာ လွတ်နေသော နေရာရှိကြောင်းသိရပြီး မြို့ကိုသိမ်းယူနိုင်ခဲ့သည်။

ကောဇာသက္ကရာဇ် ၄၆၁ ခုနှစ်တွင် အလောင်းစည်သူမင်းသည် ပွန်စလိုင် သို့ရောက်လာကာ ဦးခေါင်းဆေးမင်္ဂလာပြုခဲ့သည်။ သက္ကရာဇ် ၇၄၀ တွင် မွန်ဘုရင် ရာဇဓိရာဇ် သည် ပွန်စလိုင်နတ်ရေတွင်းရေဖြင့် ခေါင်းဆေးဘိသိတ်မင်္ဂလာပြုခဲ့သည်။

ရာဇဓိရာဇ်မင်းသည်သားတော်ဗောလောကျန်ဒေါ မှထောင်ထားခြားနားမည်ကိုစိုးရိမ်သဖြင့် အဲကောင်းဗိန် ကို သားတော်အားကွပ်မျက်ရန် စေလွှတ်လိုက်သည်။ ဗောလောကျန်ဒေါသည် ရွှေမောဓောစေတီ၌မိမိ၏လက်ဝတ်ရတနာများလှူဒါန်းပြီးခမည်းတော်အား မသင့်သောအကြံ မပြုခဲ့ပါက သေလွန်ပြီးနောက် မြန်မာတို့ဝယ် ဝင်စားပြီး ဟံသာဝတီကို အနိုင်ရပါစေကြောင်း ဆုတောင်းခဲ့သည်။ထို့နောက် ဖုံမသိန် ၃ ကျပ်သားကို သံပုရာ နှင့် ရောသောက်ကာသတ်သေခဲ့သည်။ ရာဇဓိရာဇ်လည်း ရွှေမောဓောစေတီတော်ကို ထီးတော်မှခြေရင်းအထိရွှေချကာ သံဃာတော်များကိုဆွမ်းကပ်ပြီး ဘယ်ရန်သူမှကျွန်ုပ်အားစစ်ပြု၍မတိုက်ခိုက်နိုင်စေရန် ပြန်လည်ဆုတောင်းခဲ့သည်။

အင်းဝဘုရင် မင်းဆွေ၏ မိဖုရားရှင်မိနောက်ခေါ်မိယာနှောင် သည် ကိုယ်ဝန်ရှိလာသောအခါ ဒလသရက်သီး မုတ္တမမြေသင်းခဲ နှင့် ပွန်စလိုင်နတ်ရေတွင်းရေ ကိုချဉ်ချင်းတပ်သဖြင့် လက်ဆောင်ပဏ္ဍာနှင့်တကွ လွှတ်၍တောင်းစေသည်။

ရာဇဓိရာဇ်လည်း အင်းဝဘုရင်တောင်းဆိုသော အရာများ မပေးဘဲ အခြားသော ဒေသများမှ သာရှာဖွေပေးလိုက်ကြောင်း မွန်ရာဇဝင်များတွင်တွေ့ရသည်။

သက္ကရာဇ် ၈၁၆ ခနှစ်တွင် မွန်ဘုရင်မကြီး ရှင်စောပုသည်လည်း ပွန်စလိုင်နတ်ရေတွင်း မှရေကို မကြာခဏ ဆောင်ယူစေပြီး မင်္ဂလာယူဖွယ် အခမ်းအနားများ နှင့် ဦးခေါင်းဆေးရာတွင် အသုံးပြုခဲ့သည်။

ဘုရင်မကြီးရှင်စောပုသည် ကျိုက်မရောမြို့ ဘုရားကြီးကို လာရောက်ပြုပြင် တည်ထားစဉ်က လက်အောက်ခံမြို့ဖြစ်သော မော်လမြိုင်မြို့သို့ ရောက်ရှိစဉ် ကျိုက်သလ္လံစေတီတော် အစရှိသောဘုရားများကိုလှည့်လည်ဖူးမျှော်ပြီး ပွန်စလိုင်သို့သွားကာ ဦးဆောင်ဆေးမင်္ဂလာပြုခဲ့ပေမည်။

နောက်ပိုင်းတွင် ပွန်စလိုင် နတ်ရေတွင်းမှရေကို ဆောင်ယူစေပြီး ဟံသာဝတီတွင် ခေါင်းဆေးလေ့ ရှိကြောင်းသိရသည်။

ဓမ္မစေတီမင်းကြီးသည်လည်း ပွန်စလိုင်သို့ လာရောက်ကာ နတ်ရေတွင်းရေဖြင့် ခေါင်းဆေးခဲ့သည်။

သက္ကရာဇ် ၉၇၆ ခု တွင် အနောက်ဘက်လွန်မင်း သည် ငဇင်ကာ ခေါ် ဒီဗရစ်တို ၏ သန်လျင်ကို အောင်တော်မူပြီးနောက် မုတ္တမစား ဗညားဒလ သည် မော်လမြိုင်အပါအဝင် အရံမြို့ ၃၂ မြို့မှ မြို့စားနယ်စားများနှင့်အတူ လက်ဆောင်ပဏ္ဍာ များပါ ယူဆောင်၍အနောက်ဘက်လွန်မင်းထံ ခိုဝင်၏။

အနာက်ဘက်လွန်မင်းသည် ပွန်စလိုင်တွင် ရေသဘင်ပွဲကျင်းပ သင်္ကြန်တော်ခေါ်ကာ ခေါင်းဆေးမင်္ဂလာပြုပြီးနောက် စစ်နှစ်ကြောင်းချီကာ ထားဝယ် တနင်္သာရီ သာမက သုဝန်ခလောက် သောက္ကတဲ ကမန်ပိုက် ထိအောင်သိမ်းယူနိုင်ခဲ့သည်။

မင်းရဲဒိဗ္ဗ ဧချင်းတွင် ” … …ရွှေစက်ရိပ်နှိုက် ဦးခေါင်းဆိုက်၏ မကိုက်ထွတ်ထား မဖုရားလည်း ဗညားဓမ္မရာဇာ မည်သာတထပ် ဖြူလှပ်ထီးနန်း ကျယ်ဝန်းမွန်းရ မုတ္တမကို တကွနတ်ရှင် ပေးပြီးကျင်မှ ဆင်ကစသည် ပြောစည်အုပ်ကြက် အရှေ့ဘက်သို့ ရွှေစက်ပြောင်ဝင်း ထိန်ထိန်လင်းမျှင် မြစ်မင်းယှဉ်ပြိုင် ပွန်စလိုင်ဟု ငါးဆိုင်ဆုံကျ ပင်လယ်ဝကို ဘဝရှေးလွန် ကျမ်းဂန်တွင်ပင် ကြားမထင်တည့် များဖြင့်လွှံ့ကျော် ကြီးဘုန်းတော်ကြောင့် မမြော်ဘူးလေ မြော်ရပေရှင့် ကိုးထွေမျက်ရှင် ခြယ်မွှန်းဆင်သား ရွှေစင်ပေါက်လှ ယည်နတ်သထက် နရဖုန်းထူ စီးတော်မူ၍ နေကူယောင်မြူး ဖောင်နှင့်ကူး၍ ပျံ့ပျူးမင်းလိုက် ရေနှိုက်သဘင် စံပယ်ရွှင်မှ စစ်လျင်နှစ်ကြောင်း ထောင်းထောင်းဒဝယ် အလွယ်သိမ်းယူ … … … ” ဟုရေးသားထားသည်ကိုတွေ့ရသည်။

သက္ကရာဇ် ၁၁၁၈ တွင် အလောင်းမင်းတရားသည် သန်လျင် ကို တိုက်ခိုက်ရာ မအောင်မြင်သဖြင့် ပွန်စလိုင်ရေဖြင့် ခေါင်းဆေးပြီးမှသာလျှင် အလိုပြည့်တော်မူသည်။

သက္ကရာဇ် ၁၃၀၁ ခုနှစ်တွင် မန္တလေးတောင်ရသေ့ကြီးဦးခန္ဓီ သည် သူ၏ကောင်းမှုဖြစ်သော လွန်ခဲ့သော ၃ နှစ်ခန့်က တည်ထားခဲ့သည့် မော်လမြိုင် တောင်ရိုးတန်းရှိ ဦးခန္ဓီမဟာမြတ်မုနိရုပ်ပွုါးတော်ကို လာရောက် ဖူးမြော်ရင်းခေါင်းဆေးကျွန်း နတ်ရေတွင်းတွင် ဦးခေါင်းဆေးခဲ့သည်။

ယခုထက်တိုင်လည်း ခေါင်းဆေးကျွန်းသို့ လာရောက်သူများသည် နတ်ရေတွင်းမှရေကို ဆောင်ယူကာ ခေါင်းဆေးလေ့ရှိကြောင်းသိရသည်။

ကိုးကား
-ရာဇာဓိရာဇ် အရေးတော်ပုံကျမ်း (ဗညားဒလ)
-တွင်းသင်းရာဇဝင်(တွင်းသင်းတိုက်ဝန်ဦးထွန်းညို)
-မင်းရဲဒိဗ္ဗဧချင်း
-ကိုယ်ပိုင်မှတ်စု

Photo
Kyaw Myo Oo
လေးစားစွာဖြင့် ခရက်ဒစ်

Leave a Reply

Your email address will not be published. Required fields are marked *